Yangi bog‘cha foydalanishga topshirildi

Tumanimizning “Oxunboboev” mahallasida zamonaviy usulda bunyod etilgan 24-sonli davlat maktabgacha ta’lim tashkiloti foydalanishga topshirildi. Shu munosabat bilan tashkil etilgan tantanali tadbirda sektor rahbarlari, tuman hokimi o‘rinbosarlari, tuman maktabgacha ta’lim tashkilotlari mudiralari hamda mahalla faollari ishtirok etdi. Tadbirda so‘zga chiqqanlar keyingi yillarda mamlakatimizda kelajagimiz egalari bo‘lgan bolajonlarni har taraflama barkamol qilib tarbiyalash davlatimiz belgilab olgan siyosatning ustuvor yo‘nalishiga aylangani alohida ta’kidlandi.          

    150 o‘ringa mo‘ljallangan mazkur bog‘cha investitsiya dasturi asosida 4 mlrd 50 million so‘m mablag‘ evaziga bunyod etildi.  Ikki qavatli, zamonaviy, shinam bu maskanning ochilishi nafaqat bolajonlarning, balki ota-onalarning ham quvonchiga sababchi bo‘ldi.

 - Ilgari mahallamizda va qo‘shni  Navshahar” va “Chinobod” mahallalarida bog‘cha yo‘q edi. Endilikda bu yerda uchta mahalla farzandlari ta’lim tarbiya oladi. Bog‘chada bolajonlar uchun barcha zamonaviy qulayliklar yaratilibdi. Bu biz ota-onalarni ham xursand qildi. Keng xonalar, shinam yotoqxonalar, oshxona va mashg‘ulotlar xonalarida farzandlarimiz rang-barang o‘yinchoqlar va ko‘rgazmali qurollardan foydalanib mashg‘ulotlarda qatnashayotganligidan mamnunmiz, -deydi  Dilnoza Hayitova.

   Ochilish marosimidan so‘ng, tadbir ishtirokchilari muassasada tarbiyalanuvchilar uchun yaratilgan shart-sharoitlar bilan tanishishdi.