Mehnat yarmarkasi tashkil etildi

Bugun Angor tumani hokimligi hamda Kambag‘allikni qisqartirish va bandlikka ko‘maklashish bo‘limi hamkorligida bo‘sh ish o‘rinlari mehnat yarmarkasi o‘tkazildi. Yarmarkada 58 ta korxona va tashkilotlar qatnashdi. Ishtirokchilarga 204 ta bo‘sh ish o‘rinlari tavsiya qilindi.

Yarmarkada tuman hokimi Qosim Mardonov ishtirok etib, fuqarolar bilan suhbatlashdi. Tadbirkorlik qilish istagida bo‘lgan hamda yoshlar uchun yaratilayotgan imkoniyatlar hamda ulardan samarali foydalanish bo‘yicha o‘zining tavsiyalarini berib o‘tdi.

Mehnat yarmarkasida 103 nafar yoshlar ishtirok etdi. Ishtirokchilarning 41 nafariga korxona va tashkilotlarga ishga joylashish uchun yo‘llanma berildi. Kasb-hunar egallamoqchi bo‘lgan 13 nafar yoshga tumandagi “Ishga marhamat” monomarkazidagi kasbga o‘qitish, qayta o‘qitish kurslariga yo‘llanmalar berilishi ta’minlandi.