Angor tumani hokimi Shohjahon Abdullaevning Navro‘z bayrami tabrigi

Assalomu alaykum!

Hurmatli va aziz tumandoshlar!

Ko‘klam nafasi ko‘ngillarimizda beg‘ubor his-tuyg‘ular uyg‘otayotgan ushbu qutlug‘ kunlarda, barchamiz tinch va osoyishta, yurtimizning yana bir qadimiy shodiyonasi – Navro‘z umumxalq bayramini ko‘tarinki kayfiyat, shodu xurramlik bilan kutib olmoqdamiz. Avvalombor barchangizni ana shu ulug‘ bayram bilan samimiy muborakbod etaman.

Navro‘z – azaliy milliy qadriyatlar timsoli, mehr-oqibat, saxovat va ezgulik ramzi hisoblanadi. Ushbu bayram xalqimizning bag‘rikenglik, yaxshilik, hamjihatlik kabi olijanob fazilatlarini o‘zida namoyon etadi. Yurtimizga bahor fasli kirib kelishi bilan har yili barchamiz uchun suyukli bo‘lgan onajonlarimiz, opa-singillarimiz va xotin-qizlarimizning muborak bayramini tantanali ravishda nishonlaymiz. Negaki, hozirgi kunda xotin-qizlarimiz jamiyatimizning barcha jabhalarida faoliyat ko‘rsatishib, tumanimiz, qolversa, jonajon O‘zbekistonimizning taraqqiyotiga o‘zlarining munosib hissalarini qo‘shmoqdalar.

Aziz tumandoshlar!

Navro‘zda tun bilan kun tenglashib, dehqonchilik, ziroatchilik, bunyodkorlik va obodonlashtirish ishlariga kirishiladi. Mahalla-kuy, qo‘ni-qo‘shni birlashib, ko‘chalar, xiyobonlar tartibga keltiriladi, bemorlar, ko‘makka muhtoj insonlar xolidan xabar olinadi.

Shuni alohida ta’kidlash kerakki, Navro‘zning ko‘p ming yillik tarixi va u bizning o‘lkamizda paydo bo‘lganligi ilmiy jihatdan isbotlangan. Bu qadimiy ayyom Sharq xalqlari, turli millat va elatlar tomonidan tan olinib, dunyo tamaddunida o‘z salohiyatiga ega ekanligi, u asrlar osha zukko xalqimiz tomonidan ulug‘lanib kelinayotgani, odamlar tafakkuri va hayotida bebaho qadriyat sifatida abadiy muhrlangani qalbimizga olam-olam quvonch va iftixor bag‘ishlaydi.

Hurmatli va qadrli yurtdoshlar!

Tumanimizdagi har bir xonadonga totuvlik, dasturxonlarimizga qut-baraka, qalblarga yuksak insoniy tuyg‘ularni ulashguvchi, xalqimizni jips va muruvvatli bo‘lishga, keksalarni e’zozlashga, muhtoj va ko‘ngli yarimlarga ko‘mak berishga, o‘rtadagi kelishmovchiliklarni unutishga da’vat etuvchi Navro‘zi olam dillarga shodlik bag‘ishlagan holda ko‘klam nafasi ufurib turgan dilbar faslda ona tabiat bilan yanada yaqinroq va uyg‘un yashashga chorlaydi.

Navro‘zi ayyom barchangizga qutlug‘ bo‘lsin, aziz tumandoshlar!