Jinoyatga jazo muqarrar

Ma’naviyati nuqsonli bo‘lgan kishi borki, xatti-harakati oqibatini o‘ylamay  ish qilib, jinoyatchi, degan tamg‘ani orttirib oladi. Bugun e’tiboringizga havola etilayotgan jinoyat tafsiloti ishtirokchi ham bir umidvor mushtipar onaning dilbandi, qariganimda suyanch bo‘ladi degan umidda ulg‘aytirgan otaning o‘g‘li.  
Afsuski, jinoyat yo‘lini tanlagan yigit jismonan sog‘lom, tog‘ni ursa talqon qiladigan yoshda. Biroq, u og‘irning ustidan, yengilning ostidan o‘tishni afzal ko‘rgan odam. 

Sudning hukmiga ko‘ra, Azimov Islom Turabovich (ismi sharifi o‘zgartirilgan) Termiz shahar, Bog‘zor mahallasida yashovchi Kim Aleksandrdan (ismi sharifi o‘zgartirilgan)2023 yil 17 mart kuni 2 dona “Ayfon 14 pro maks”, 1 dona “Ayfon 14 pro”, 2 dona “Ayfon 13 pro maks” telefonlarini jami 59.000.000 so‘mga hisoblab sotib olib, bu pullarni 1 hafta muddat ichida berishni va’da qilib, A.Kimning ishonchiga kirib, A.Kimdan olgan ushbu telefon apparatlarini naqd pulga boshqa xaridorlarga sotishga erishib, sotish natijasida qo‘lga kiritgan pullarni A.Kimga bermasdan, A.Kimning ishonchini suiiste’mol qilib, ushbu pullarni o‘zining shaxsiy ehtiyojlariga sarflab yuborgan.
Bundan tashqari, Azimov Islom Turabovichning jinoiy harakatlarini qasddan davom etirib, 2023 yil 24 may kuni A.Kim 2023 yil 17 mart kuni sotgan jami 5 dona telefon apparatlarining pullarini berishni, bo‘lmasa ushbu telefonlarning korobkasi o‘zida bo‘lganligi uchun ushbu telefonlar o‘g‘irlanganligi haqida ariza bilan murojaat qilishini aytganidan so‘ng I.Azimov Termiz shahrida bo‘lgan “Indenim” savdo majmuasida qo‘l telefonlari savdosi bilan shug‘ullanuvchi Raximov Jamjid Shavkatovichning (ismi sharifi o‘zgartirilgan) oldiga borib, undan 59.000.0000 so‘m pul berib turishini, bu pul evaziga 1 soat muddat ichida A.Kimdan 7 dona “Phone 14 pro max” telefonlarini olib berishni va’da qilib, A.Kim o‘ziga telefon apparatlari bermasligini, J.Raximovdan olinayotgan 59.000.000 so‘m pullarni o‘zining oldingi olgan telefonlari uchun berayotganligini ongli ravishda anglasa-da, J.Raximovga yolg‘on va’da berib, ushbu telefonlarni olib kelgunga qadar o‘zining tanishi B.Rasulovning Spark rusumli 75 P 703 DA davlat raqam belgili avtomashinasini garov sifatida qoldirib ketishini ham ma’lum qilib, bu bilan J.Raximovning ishonchiga kirib, J.Raximovdan 59.000.000 so‘m pullarni olishga erishib, ushbu pullarni olgan vaqtning o‘zida A.Kimga undan olgan jami 5 dona telefon apparatlarning puliga hisoblab berib, J.Raximov orqali A.Kimga berishi kerak bo‘lgan pullarini berishga erishib, Raximov Jamjid Shavkatovichga ushbu pullarni qaytarmasdan uni aldab ketgan.
Sudda sudlangan Azimov Islom Turabovich aybiga to‘liq iqror va pushaymonlik bildirib suddan qonuniy yengillik berishni so‘ragan.
Ushbu jinoyat ishi jinoyat ishlari bo‘yicha Termiz shahar sudi tomonidan ko‘rib chiqilib, ish hujjatlari atroflicha o‘rganilib, sudning 2023 yil 14 dekabr kunidagi hukmiga ko‘ra, Azimov Islom Turabovichga nisbatan O‘zbekiston Respublikasi JK 168-moddasi 3-qismining “b” bandi bilan JKning 57-moddasini qo‘llab, 5 yil muddatga ozodlikdan mahrum qilish jazosi tayinlanib, sudlanuvchi I.Azimovdan jabrlanuvchi J.Raximov foydasiga 59.000.000 so‘m miqdoridagi moddiy zarar undirish belgilangan.
Jinoyat ishi Surxondaryo viloyat sudi jinoyat ishlari bo‘yicha sudlov hay’ati apellyasiya instansiyasida sudlangan I.Azimovning apellyasiya tartibidagi shikoyatiga asosan 2024 yil fevral oyining 27 kuni ko‘rib chiqilib, jinoyat ishlari bo‘yicha Termiz shahar sudining 2023 yil 14 dekabr kunidagi hukmi o‘zgarishsiz, shikoyat qanoatlantirilmasdan qoldirilgan.
Halqimizda “Sayoq yursang tayoq yeysan” degan dono bir hikmat bor.
Mana ko‘za kunda emas, kunida sinadigan kun keldi. Qonunning qo‘li uzun, nigohlari o‘tkir. Uning nazaridan, qat’iy talabidan, qolaversa, jazodan qochib qutilib bo‘lmaydi.  
Surxondaryo viloyat sudi
jinoyat ishlari bo‘yicha
sudlov hay’ati sudyasi J.Xudoyberdiyev