O‘qishga kiritishni aytib pul olgan shaxs ushlandi
Muzrabot tumanida yashovchi Sherzod Botirov (ism-sharifi o‘zgartirilgan) oliy ma’lumotli o‘qituvchi bo‘lsada, ishonuvchan odamlarni aldab, oson pul topishni ko‘zladi.
2023 yil 12 aprel kuni Tojikiston Respublikasi, Dushanbe shahrida joylashgan “Moliya” nomli oliygohga o‘qishga kirish istagida bo‘lgan nomzodlarning rasmiy hujjatlarini qabul qilish xizmat vazifasiga kirmasada, o‘qishga kirish istagida bo‘lgan nomzodni A.Jumaevni (ism-sharifi o‘zgartirilgan) aldab, go‘yoki qisqa fursatlarda A.Jumaevni Tojikiston Respublikasi, Dushanbe shahrida joylashgan “Moliya” nomli oliygohga o‘qishga kiritib qo‘yishni va’da qilib, buning evaziga undan 1.000 AQSh dollari miqdordagi pullarni talab qilgan.
Shundan so‘ng, Sh.Botirov Angor tuman hududida A.Jumaevdan 1.000 AQSh dollarini firibgarlik yo‘li bilan olayotgan vaqtda IJQK Departamenti Angor tumani bo‘limi xodimlari tomonidan ashyoviy dalillar bilan ushlangan.
Ushbu holat yuzasidan olib borilgan tergov harakatlari yakunlanib, jinoyat ishi jinoyat ishlari bo‘yicha Angor tuman sudiga taqdim etiladi.
Sudda Sh.Botirov qilmishiga to‘liq iqror bo‘lib, Tojikiston Respublikasi, Dushanbe shahrida joylashgan “Moliya” nomli oliygoh rektorini tanimasligi, o‘ziga pul kerak bo‘lgani uchun A.Jumaevni aldab, shu yo‘l bilan pullarini olmoqchi bo‘lganini bayon etib, suddan o‘ziga yengillik berishni so‘radi.
Jabrlanuvchi A.Jumayev, ayblanuvchi qilgan ishi uchun pushaymonligi va kechirim so‘raganligi, uning yoshligini hisobga olib, yarashish to‘g‘risidagi taklifga rozilik bildirdi.
Shunday qilib, sud jarayonida tomonlar o‘zaro kelishib, yarashuv yo‘lini tutdi. Ushbu jinoyat ishi yuzasidan sudning ajrimi qabul qilindi.
Yuqoridagilardan xulosa qilib shuni aytish lozimki, pora olish yoki berish, mansab mavqeini suiiste’mol qilish, o‘zganing mulkini o‘zlashtirish va boshqa shu kabi korrupsion jinoyatlarga qarshi kurashda davlat organlari bilan birga jamiyatning, ya’ni fuqarolarning, ayniqsa matbuotning faolligi, albatta o‘zining ijobiy natijasini beradi, yurtimiz yanada yuksalib, O‘zbekiston yuksak huquqiy davlat sifatida jahonda o‘zining munosib o‘rnini egallaydi.
Jinoyat ishlari bo‘yicha
Angor tuman sudining raisi S.Bo‘tayev