Murojaat va yechim

Jumagul Ochilova Angor tumanining Yangi turmush mahallasida yashaydi. 3 nafar farzandning onasi. J.Ochilova farzandlari bilan birgalikda 13 yil davomida uy-joyi yoʻqligi sababli ijarada yashadi. Tuman hokimligi ishchi guruhi tomonidan uning uy-joy masalasida qilgan murojaati oʻrganildi va ijobiy echimini topdi.
Oʻzbekiston Respublikasi Vazirlar Mahkamasining 2018-yil 12 apreldagi “Ogʻir ijtimoiy vaziyatga tushib qolgan xotin-qizlarga, nogironligi boʻlgan, kam ta’minlangan, farzandlarini toʻliqsiz oilada tarbiyalayotgan va uy-joy sharoitini yaxshilashga muhtoj onalarga arzon uy-joylar berish tartibi toʻgʻrisidagi Nizomni tasdiqlash haqida”gi 285-sonli qaroriga asosan Respublika Xotin-qizlar va oilani qoʻllab-quvvatlash jamoat fondi tomonidan uy-joyning boshlangʻich toʻlovi toʻlab berildi.
Tuman hokimligining tashabbusi bilan ikki xonali uy toʻliq bitkazilib, Jumagul Ochilova oilasiga topshirildi.
-Farzandlarimni yolgʻiz voyaga etkazyapman. Oilaviy sharoitimiz ogʻir boʻlganligi uchun uy-joy masalasida murojaat qilgandim. Mana murojaatimiz ijobiy hal etilib, yangi uyga koʻchib oʻtdik. Buning uchun yurtboshimizga minnatdorchilik bildiraman,-deydi Jumagul Ochilova.