O‘rgangan ko‘ngil o‘rtansa qo‘ymas.

Ishning o‘zini emas, ko‘zini bilish kerak deganlaridek, Eshbolta (ism o‘zgartirilgan) yengilning ustidan, og‘irning ostidan o‘tib, mo‘may daromad olishni kasb qilmoqchi bo‘ldi —dallollikdan osoni yo‘q.

 Eski tanishi Malik qassoblik bilan shug‘ullanadi. Uni doimiy go‘sht, ya’ni semirtirilgan chorva mollari bilan ta’minlab tursa, pichog‘i moy ustida bo‘lishi aniq. Tanish-bilishlarning semirtirgan chorva mollarini nisbatan arzonroq narxda savdolashadi-da, Malikka sotadi. Avval ham ishi baroridan kelib, bir-ikki so‘mlik bo‘lib olgandi. Navbatdagi savdo o‘xshasa, qassob yigit naqd 36 million so‘mni sanaydi. Ammo, negadir o‘sha kunning kelishi uzoq cho‘zildi. Bir-ikki bor so‘rab bordi ham, qarzga topshirilgan go‘shtlarning pulini yig‘ib olgandan yo‘qlashini va’da qilgan Malik Rossiya Federatsiyasiga juftakni rostlab qoldi.

‘‘O‘rtanchi’’ esa semirtirilgan mollar bilan ta’minlaganlar dallolning eshigini qoqib kelaverishidan quloqlar qomatga keldi. Oson ishning buyog‘i qiyin bo‘ladigan bo‘ldi. Ohini qayerga aytishni bilmay, kerakli tartibot organiga xabar berdi. Buni qarangki, Rossiyada ham qassob yigit o‘z firiblarini qo‘ymadi shekilli, qo‘lga tushib hibsga olingani ayni muddao bo‘ldi. Qisqa muddat ichida Rossiyadan O‘zbekiston Respublikasiga etap qilib olib kelindi. Ish bo‘yicha boshlangan sud ishida esa aybdorlar munosib xulosa chiqardi. Malik qarzdan qutuldi, Eshbolta esa kasbidan...

S.SUVONQULOV,
viloyat Jinoyat ishlari boʻyicha sudining sudyasi