Oʻzbekiston Respublikasi Prezidentining Qarori

Oʻzbekiston Respublikasi Prezidentining
Qarori
Hududlarni kompleks rivojlantirishni ta’minlashda mahalliy davlat boshqaruvi organlari faoliyatini takomillashtirishga oid qoʻshimcha chora-tadbirlar toʻgʻrisida
LexUZ sharhi
Mazkur qaror Oʻzbekiston Respublikasi Prezidentining 2017 yil 16 martdagi PQ-2840-sonli «Oʻzbekiston Respublikasi Iqtisodiyot vazirligi hududiy boshqarmalari faoliyatini tashkil qilish chora-tadbirlari toʻgʻrisida»gi qaroriga asosan oʻz kuchini yoʻqotgan.
Hududlarni kompleks va mutanosib tarzda rivojlantirishni ta’minlash, mintaqalarning mavjud tabiiy-xomashyo, ishlab chiqarish va mehnat salohiyatidan oqilona foydalanish, ishlab chiqarish kuchlarini optimal joylashtirish hamda aholining turmush darajasi va sifatini izchil oshirib borish, shuningdek mahalliy ijroiya hokimiyat organlari faoliyatini tashkil etishni yanada takomillashtirish va uning samaradorligini oshirish boʻyicha tizimli dasturiy chora-tadbirlarni amalga oshirish maqsadida:
1. Viloyatlar va Toshkent shahar hokimliklari, Oʻzbekiston Respublikasi Iqtisodiyot vazirligi hamda Moliya vazirligining:
viloyatlar va Toshkent shahar hokimliklarining boshqaruv apparati tuzilmasida, tegishli ravishda viloyatlar va Toshkent shahrining iqtisodiyot bosh boshqarmalarini tugatib, hududni kompleks rivojlantirish yigʻma boshqarmalarini;
tuman va shahar hokimliklarining boshqaruv apparati tuzilmasida tugatilayotgan tuman va shahar iqtisodiyot boʻlimlari negizida hududni kompleks rivojlantirish boʻlimlarini tashkil etish boʻyicha taklifi qabul qilinsin.
2. Qoraqalpogʻiston Respublikasi Vazirlar Kengashi bir oy muddatda Qoraqalpogʻiston Respublikasi Iqtisodiyot vazirligining faoliyatini yanada takomillashtirish va mustahkamlash boʻyicha Oʻzbekiston Respublikasi Vazirlar Mahkamasiga takliflar kiritsin.
LexUZ sharhi
Qarang: Oʻzbekiston Respublikasi Vazirlar Mahkamasining 2016 yil 14 apreldagi 113-sonli «Qoraqalpogʻiston Respublikasi Iqtisodiyot vazirligi faoliyatini yanada takomillashtirish chora-tadbirlari toʻgʻrisida»gi qarori.
3. Hududlarni kompleks rivojlantirish yigʻma boshqarmalarining asosiy vazifalari va yoʻnalishlari etib quyidagilar belgilansin:
hududlarning iqtisodiy va ijtimoiy rivojlanish darajasini tizimli asosda tahlil qilib borish, mavjud nomutanosibliklar, zaxiralar va ishlab chiqarishga jalb etilmagan mineral-xomashyo, mehnat va ishlab chiqarish salohiyatini aniqlash, uning asosida va mamlakatni istiqbolda ijtimoiy-iqtisodiy rivojlantirishning strategik ustuvor yoʻnalishlaridan kelib chiqqan holda, hududlarni kompleks taraqqiy ettirishning joriy va oʻrta muddatli dasturlarini ishlab chiqish, mintaqalar iqtisodiyotini chuqur tarkibiy oʻzgartirish va diversifikatsiyalash;
tarmoq tuzilmalari bilan birgalikda mintaqalarning sanoat potentsialini jadal rivojlantirish, mineral-xomashyo va qishloq xoʻjaligi mahsulotlarini sanoat asosida yanada chuqur qayta ishlash boʻyicha yangi yuqori texnologiyali ishlab chiqarishlarni tashkil etish, yuqori qoʻshilgan qiymatli raqobatdosh mahsulotlar chiqarishni tashkil etish va shuning asosida eksportga etkazib berilayotgan mahsulotlar hajmi va turlarini koʻpaytirish boʻyicha dasturiy chora-tadbirlar ishlab chiqish;
hududiy investitsiya dasturlari ishlab chiqishni ta’minlash va amalga oshirilishi, yangi ishlab chiqarish ob’ektlari qurish va oʻz vaqtida ishga tushirish hamda amaldagilarini modernizatsiyalashning borishi ustidan monitoring olib borish, respublika iqtisodiyotini rivojlantirishning oʻrta va uzoq muddatli tasdiqlangan dasturlariga kiritilgan yirik investitsiya loyihalarini bajarishda koʻmaklashish, pudrat tashkilotlarini mutanosib tarzda rivojlantirish va moddiy-texnika bazasini mustahkamlash chora-tadbirlarini roʻyobga chiqarish, mintaqaviy investitsiya dasturlarini amalga oshirishga xorijiy investorlarni jalb etish boʻyicha faol ish olib borish;
muhandislik, yoʻl-transport va telekommunikatsiya infratuzilmasini ildam rivojlantirish, transport xizmati koʻrsatishni yanada yaxshilash, uy-joy — kommunal xizmatlari koʻrsatish darajasi va sifatini tubdan oshirish, aholini sifatli ichimlik suvi va sanitar tozalash tizimi bilan ta’minlash, aholi punktlarini obodonlashtirish boʻyicha dasturiy chora- tadbirlar ishlab chiqish;
qishloq xoʻjaligini yanada rivojlantirish, er-suv resurslaridan oqilona foydalanish va qishloq xoʻjaligi ekinlarini maqbul joylashtirish, qishloq xoʻjaligi ishlab chiqarishini tarkibiy jihatdan oʻzgartirish, zamonaviy agrotexnologiyalarni va suvdan tejamli foydalanish usullarini joriy etish, erlarning meliorativ holatini yaxshilash, qishloq xoʻjaligi xom ashyosini yanada chuqur qayta ishlash hamda meva-sabzavot va goʻsht-sut mahsulotlarini saqlash uchun muzlatish quvvatlarini tashkil etishni chuqur tahlil qilish va bu ishlarni takomillashtirish yuzasidan takliflar ishlab chiqish;
mintaqadagi demografik jarayonlar hamda aholining jins va yosh tarkibini, uning bandlik darajasi va tarkibini tizimli tahlil qilish, shuning asosida ishlab chiqarish kuchlarini maqbul joylashtirish va yangi ish oʻrinlari yaratish hisobidan band boʻlmagan aholini, ayniqsa yoshlarni ish bilan ta’minlash, aholi turmush darajasi va sifatini yanada oshirish, ijtimoiy infratuzilmani rivojlantirish, uy-joy sharoitlarini yaxshilash, aholiga tibbiy, ta’lim va ijtimoiy-madaniy xizmat koʻrsatishni yanada takomillashtirish boʻyicha takliflar tayyorlash.
4. Quyidagilar:
viloyatlar va Toshkent shahar hokimliklari boshqaruv apparatining hududlarni kompleks rivojlantirish yigʻma boshqarmalarining namunaviy tuzilmalari 1 va 1a-ilovalariga* muvofiq;
hududlarni kompleks rivojlantirish yigʻma boshqarmalari va boʻlimlari xodimlarining cheklangan soni 2 va 2a-ilovalariga* muvofiq;
hududlarni kompleks rivojlantirish yigʻma boshqarmalari xodimlarining mehnatiga haq toʻlashning tabaqalashtirilgan razryadlari 3-ilovaga* muvofiq tasdiqlansin.
5. Belgilansinki:
hududlarni kompleks rivojlantirish yigʻma boshqarmalari viloyatlar va Toshkent shahar hokimlariga, hududlarni kompleks rivojlantirish boʻlimlari esa, tegishli ravishda shahar va tuman hokimlariga bevosita boʻysunadi;
hududlarni kompleks rivojlantirish yigʻma boshqarmalarining boshliqlari Oʻzbekiston Respublikasi Iqtisodiyot vazirligi bilan kelishilgan holda tegishli viloyat va Toshkent shahar hokimlarining qarorlari bilan lavozimlarga tayinlanadilar va ozod etiladilar;
shahar va tuman hokimliklarining hududlarni kompleks rivojlantirish boʻlimlari boshliqlari lavozimiga tegishli viloyat va Toshkent shahar hokimlari bilan kelishilgan holda tuman va shahar hokimlarining qarorlari bilan lavozimlarga tayinlanadilar va ozod etiladilar.
6. Viloyatlar va Toshkent shahar hokimliklarining hududlarni kompleks rivojlantirish yigʻma boshqarmalarini kadrlar bilan toʻldirish va suhbat oʻtkazish Komissiyasi 4-ilovaga* muvofiq tarkibda tashkil etilsin.
* 1 — 4-ilovalar rus tilidagi matnda berilgan.
Komissiya (R. Azimov) viloyatlar va Toshkent shahar hokimlari bilan birgalikda:
ikki oy muddatda suhbat oʻtkazib, yigʻma boshqarmalarni malakali kadrlar bilan toʻldirsin, unda ularning kasbiy tayyorgarligi, hudud iqtisodiyotini rivojlantirish masalalarini chuqur bilishi, iqtisodiyotni tarkibiy jihatdan oʻzgartirishni chuqurlashtirish va diversifikatsiyalash vazifalarini hal etishdagi tashabbuskorligiga alohida e’tibor qaratsin;
yigʻma boshqarmalar va boʻlimlar xodimlarining malakasini oshirish, shu jumladan ularni oʻquv kurslariga yuborish, respublikaning vazirlik va idoralarida, shuningdek etakchi xorijiy oʻquv markazlarida stajirovkadan oʻtish tizimini tashkil etish choralarini koʻrsin.
LexUZ sharhi
Qarang: Oʻzbekiston Respublikasi Vazirlar Mahkamasining 2016 yil 2 maydagi 133-sonli «Qoraqalpogʻiston Respublikasi Iqtisodiyot vazirligi, viloyatlar, Toshkent shahri, tumanlar va shaharlar hokimliklarining hududlarni kompleks rivojlantirish yigʻma boshqarmalari va boʻlimlari xodimlarini qayta tayyorlash va ularning malakasini oshirish toʻgʻrisida»gi qarori.
7. Oʻzbekiston Respublikasi Vazirlar Mahkamasi viloyatlar va Toshkent shahar hokimliklari, Moliya vazirligi bilan birgalikda bir hafta muddatda hududlarni kompleks rivojlantirish yigʻma boshqarmalarining Namunaviy nizomini, shuningdek, shtatlar jadvali va mas’ul xodimlarning xizmat vazifalarini belgilangan tartibda tasdiqlasin.
LexUZ sharhi
Qarang: Oʻzbekiston Respublikasi Vazirlar Mahkamasining 2016 yil 23 martdagi 82-sonli «Viloyatlar, Toshkent shahri, tumanlar va shaharlar hokimliklarining hududlarni kompleks rivojlantirish yigʻma boshqarmalari va boʻlimlari toʻgʻrisidagi namunaviy nizomlarni tasdiqlash haqida»gi qarori.
8. Viloyatlar, Toshkent shahri, shahar va tumanlar hokimliklari bir hafta muddatda hududlarni kompleks rivojlantirish yigʻma boshqarmalari va boʻlimlarini joylashtirib, ularni zarur uskunalar, kompyuter texnikasi, mebel va aloqa vositalari bilan ta’minlasin.
9. Oʻzbekiston Respublikasi Vazirlar Mahkamasining «Oʻzbekiston Respublikasi Iqtisodiyot vazirligining faoliyatini tashkil etish toʻgʻrisida» 2003 yil 22 yanvardagi 37-son qaroriga (Oʻzbekiston Respublikasi QT, 2003 y., №1, 10-modda) 5-ilovaga muvofiq oʻzgartishlar kiritilsin.
Oʻzbekiston Respublikasi Iqtisodiyot vazirligi viloyatlar va Toshkent shahar hokimliklari, Adliya vazirligi va boshqa manfaatdor tuzilmalar bilan birgalikda bir oy muddatda qonun hujjatlariga kiritiladigan oʻzgartish va qoʻshimchalar toʻgʻrisidagi takliflarni Oʻzbekiston Respublikasi Vazirlar Mahkamasiga kiritsin, shuningdek normativ-huquqiy hujjatlarni ushbu Qarorga muvofiqlashtirishni ta’minlasin.
10. Mazkur qarorning ijrosini nazorat qilish Oʻzbekiston Respublikasining Bosh vaziri Sh. Mirziyoev zimmasiga yuklansin.
Oʻzbekiston Respublikasi Prezidenti I. KARIMOV
Toshkent sh.,
2016 yil 22 fevral,
PQ-2495-son
Oʻzbekiston Respublikasi Prezidentining 2016 yil 22 fevraldagi PQ-2495-son qaroriga
5-ILOVA
Oʻzbekiston Respublikasi Vazirlar Mahkamasining «Oʻzbekiston Respublikasi Iqtisodiyot vazirligining faoliyatini tashkil etish toʻgʻrisida» 2003 yil 22 yanvardagi 37-son qaroriga kiritiladigan oʻzgartishlar
1. Quyidagilar oʻz kuchini yoʻqotgan deb hisoblansin:
3-bandining ikkinchi va uchinchi xatboshilari hamda 2, 2a, 3 va 4-ilovalar;
4-bandi;
2. 7-bandining ikkinchi xatboshidagi «iqtisodiyot hududiy bosh boshqarmalari boshliqlari» soʻzlari chiqarib tashlansin.
3. 5-ilovasida (Oʻzbekiston Respublikasi Iqtisodiyot vazirligi toʻgʻrisidagi nizom):
14-bandining toʻrtinchi xatboshidagi «va uning hududiy organlari» soʻzlari hamda 22-bandidagi «va uning hududiy boʻlinmalari» soʻzlari chiqarib tashlansin;
18-bandi oʻz kuchini yoʻqotgan deb hisoblansin.

(Oʻzbekiston Respublikasi qonun hujjatlari toʻplami, 2016 y., 8-son, 75-modda)