DOLZARB O‘N BESH KUNLIK DAVOM ETMOQDA
O‘simliklarning zararkunanda va kasalliklari, begona o‘tlar ekinlarga, xususan, hosilga katta zarar yetkazadi. Shu sababli qishlok xo‘jaligi mahsulotlarini yetishtirishda, ularni saqlab qolishda O‘simliklar karantini va himoyasi tizimi sohasida olib borilayotgan ishlar muhim sanaladi. Bugun hosilni samarali himoya qilishga zararkunanda va kasalliklarning rivojlanishi hamda ko‘payishi prognozini tuzish, zararkunandalar miqsori hamda kasalliklar o‘chog‘ini o‘z vaqtida aniqlash maqsadida ekin, ko‘chatlarni, shuningdek, begona o‘tlarni tekshiruvdan o‘tkazish, turli usul va vositalar qo‘llab o‘simliklarga ishlov berish kabi chora - tadbirlar natijasini bermokda. Zararkunanda, kasalliklar va begona o‘tlarga qarshi bir qancha kurash usullari qo‘llanadi.
O‘zbekiston Respublikasining “O‘simliklar karantini to‘g‘risida”gi Qonuniga muvofiq respublikaning fitosanitar xavfsizligini ta’minlash, zararkunandalarning bir hududdan ikkinchi hududga tarqalishining oldini olish, ularga qarshi ommaviy kurash ishlarini tashkillashtirish va hududlardagi zararkunanda hamda kasalliklarni aniqlash bilan birgalikda nazorat qilish maqsadida, O‘simliklar karantini va himoyasi agentligi tomonidan 2022-yilning 20-yanvaridan 15-fevraliga qadar “Dolzarb o‘n besh kunlik” tadbiri e’lon qilindi. Ushbu tadbir doirasida Surxondaryo viloyat O‘simliklar karantini va himoyasi boshqarmasi va tuman bo‘limlarida bir qator samarali ishlar amalga oshirilmoqda. Bu galgi topshiriq rejasiga asosan asosiy e’tibor sitrus va pomidor ekinlarining ashaddiy zararkunandasi bo‘lgan “Sitrus oqqanoti”, “Sitrus inli kuyasi”, “Pomidor kuyasi” kabi zararkunandalarga hamda “Pomidorning jigarrang bujmayish virusi”ni aniqlash, nazorat qilish hamda ularga qarshi keng qamrovli kurash ishlari olib borilmoqda.
Bugun Termiz tuman O‘simliklar karantini va himoyasi bo‘limi inspektorlari va agronom entomologlari tumanning «Yangi xayot» mahallasida joylashgan aholi xonadonlarida bo‘lib, issiqxonalardagi sitrus mevalarni ko‘zdan kechirdilar. Pamidor ko‘chatini ekish jarayonlarida ishtirok etib, ularga bu boradagi ilmiy amaliy tavsiyalarini berdi.
Shuningdek, bugun Qizirik, Jarqo‘rg‘on, Sherabod, Denov, Sariosiyo, Uzun, Boysun, Qumkurg‘on tumani O‘simliklar karantini va himoyasi bo‘limi agronom inspektorlari ham aholi xonadonlarida bo‘lishdi. Shaxsiy tomarka yer egalariga sitrus va pomidor ekinlarining ashaddiy zararkunandasi bo‘lgan “Sitrus oqqanoti”, “Sitrus inli kuyasi”, “Pomidor kuyasi” kabi zararkunandalarga hamda “Pomidorning jigarrang bujmayish virusi”ni aniqlash bo‘yicha targ‘ibot va tashviqot ishlarini olib borishdi.
Viloyatning barcha tuman bo‘limlarda “Dolzarb o‘n besh kunlik” tadbirlari davom etmoqda.
Akram Absamatov.
Surxondaryo viloyat O‘simliklar karantini va himoyasi boshqarmasi boshlig‘i o‘rinbosari
Viloyat O‘simliklar karantini va himoyasi boshqarmasi ichki karantin bo‘limi boshlig‘i