Obodonlashtirish ishlari davom etmoqda

Surxondaryo viloyatida mahallabay ishlashning yangi tizimini yo‘lga qo‘yish va bu orqali aholi bandligini  ta’minlash bo‘yicha keng qamrovli ishlar olib borilmoqda. Viloyatda 195 ta iqtisodiy-ijtimoiy ahvoli nisbatan og‘ir hududlar aniqlanib, obodonlashtirish ishlari yo‘lga qo‘yilgan. Ushbu ro‘yxatga  Angor tumanidagi 6 ta mahalla ham kiritilgan. Birinchi sektor hududida joylashgan Yuqori Xo‘jaqiya mahallasi shular jumlasidandir.

 Yuqori Xo‘jaqiya mahallasida jami 18 km ichki xo‘jalik yo‘llari mavjud bo‘lib, shundan 9 km qismi tuproq yo‘llardan iborat. O‘tgan yilda ushbu yo‘llarning 4 kilometr qismiga shag‘al-tosh yotqizilgan.  Joriy yilda qolgan 5 km yo‘lga tosh-shag‘al to‘kish ishlari rejalashtirilgan.

 Bugun mahallada tashkil etilgan keng qamrovli obodonlashtirish hasharida mazkur yo‘llarga tosh-shag‘al yotqizish ishlari boshlab yuborildi. Ushbu ishlar uchun qirqga yaqin maxsus texnikalar va tumandagi ko‘ngillilar jalb etildi.

Tadbirda ishtirok etgan viloyat hokimi To‘ra Bobolov tumandagi hokim yordamchilari va yoshlar yetakchilari bilan suhbatlashib, ularning manzilli dasturlari bilan tanishdi.

-Mahallada parrandachilikni rivojlantirishni yo‘lga qo‘yishni rejalashtirganmiz. Hozirgi kunga qadar ehtiyojmand, ish bilan band bo‘lmagan 30 ta xonadonga tovuq jo‘jalarini  tarqatdik. Ularga oylik maosh ham belgilangan. Jizzax va Toshkent viloyatidan mutaxassislar ham jalb qilganmiz. Mutaxassislar fuqarolarga parrandandachilikni rivojlantirish orqali tadbirkorlikni yo‘lga qo‘yishni o‘rgatmoqda, - deydi Kayran mahallasi hokim yordamchisi Sherzod Yo‘lliyev.

Shundan so‘ng, viloyat hokimi “Ayollar daftari” va “Yoshlar daftari”ga kiritilib, imtiyozli kredit olgan va hozirda o‘z biznesini yo‘lga qo‘ygan tadbirkorlar faoliyati bilan tanishdi. Shuningdek, yoshlarning bo‘sh vaqtlarini mazmunli o‘tkazish bo‘yicha tashkil etilgan sport to‘garaklarida ishtirok etib kelayotgan yoshlar bilan ham suhbatlashdi va mazkur ishlarni yanada samarali yo‘lga qo‘yish bo‘yicha yoshlar yetakchilariga zarur tavsiyalarni berdi.

-Ish faoliyatimizni xatlov jarayonidan boshlaganmiz. Mahalladagi har bir yosh bilan ishlab, muammosini hal etish, beshta muhim tashabbus ijrosini ta’minlash, yoshlarni vatanparvarlik ruhida tarbiyalash, hokim yordamchilari bilan birgalikda yigit-qizlarning kasbiy ko‘nikmalarini rivojlantirish va tadbirkorlikka yo‘naltirish ishlarini olib borishni rejalashtirganmiz,-deydi viloyat hokimi bilan bo‘lgan suhbatda Navro‘z mahallasi yoshlar yetakchisi Umrzoq Xurramov.

Viloyat hokimi mahalladagi fuqarolar bilan ham uchrashdi. Ular bilan o‘tkazilgan ochiq muloqot davomida so‘ngi yillarda mamlakatimizda “Inson qadri uchun” tamoyili asosida amalga oshirilgan keng islohotlar  xususida  to‘xtaldi.

Yig‘ilishda ushbu boshlangan tadbir mahalladagi tuproq yo‘llariga tosh-shag‘al yotqizish, elektr energiya sifatini yaxshilash uchun yaroqsiz holga kelib qolgan ustun va tarmoqlarni yangilash ishlarini to‘liq amalga oshirish orqali tugatilishini ma’lum qildi. 

Mahallada obodonlashtirish va bunyodkorlik ishlari davom etmoqda.