«Ustoz-2020» Milliy tanlovi g‘oliblariga 30 mln so‘mdan mukofot puli hamda Dubayda bo‘lib o‘tadigan taqdirlash marosimiga yo‘llanma beriladi

Joriy yilda ilk bor «Yilning eng yaxshi o‘qituvchisi» tanlovi o‘zgacha shaklda o‘tkaziladi. Tanlovda tizimli islohot qilish uchun xalqaro tajriba asosida tanlovni bu yildan boshlab vazirlik xodimlari emas, aynan o‘qituvchilar o‘tkazadi.

Tanlovning asosiy tashkilotchisi sifatida O‘zbekiston tarixida ilk bor «O‘qituvchilar uyushmasi» nodavlat notijorat tashkiloti ishtirok etadi.

Tanlovda 6 ta nominatsiya bo‘yicha g‘oliblarning har biriga 30 mln so‘m mukofot puli beriladi hamda g‘oliblar har yili Dubay shahrida bo‘lib o‘tadigan Global Teacher Prize 2021 taqdirlash marosimida ishtirok etish imkoniyatini qo‘lga kiritadi.

Tanlov ilk bor har yili o‘tkazib kelinadigan Global Teacher Prize mukofotini va 36 ta mamlakatda o‘qituvchilarning milliy musobaqalarini o‘tkazishga yordam beradigan Varkey Foundation xalqaro tashkiloti bilan hamkorlikda o‘tkaziladi.

Bularning barchasi o‘zbek o‘qituvchilarining o‘zlarini jahon o‘qituvchilar hamjamiyatining bir qismi deb his qilishlari maqsadida amalga oshirilgan.

Ko‘p yillar davomida musobaqa tuman, shahar, viloyat va respublika bosqichlarini o‘z ichiga olgan tarzda bo‘lib o‘tdi. Bu safar barcha o‘qituvchilar bir vaqtning o‘zida www.ustozmukofoti.uz veb-saytiga ariza yuborishlari mumkin va tanlov ma’lum bir geografik hududga tegishli bo‘lishidan qat’iy nazar amalga oshiriladi.

Bundan tashqari, hozirgi paytda o‘qituvchilar o‘z fani bo‘yicha bilim bilan emas, balki o‘quvchilar bilan aloqa o‘rnatish qobiliyati, yetakchilik, jamiyatdagi faol fuqarolik pozitsiyasi, ijodkorlik, o‘quvchilarni vatanparvarlik ruhida tarbiyalash, shu bilan birga ularni jahon hamjamiyatining bir qismi sifatida his qilishlariga yordam berish kabi mezonlar bo‘yicha raqobatlashmoqda.

Arizalar faqat www.ustozmukofoti.uz veb-saytida qabul qilinadi va shaffoflikni ta’minlash uchun tanlov mezonlari va shartlari to‘g‘risidagi barcha ma’lumotlar hamda barcha ishlar namoyish etiladi.

Tanlov joriy yilning 22 oktyabridan 16 dekabrgacha o‘tkazilib, pandemiya sharoitida tanlovning 3 bosqichidan 2 tasi onlayn tarzda o‘tkaziladi.

So‘nggi bosqichda final bosqichiga chiqqan 30 nafar ishtirokchi Toshkent viloyatidagi dam olish oromgohida 5 kunlik treningda ishtirok etib, mazmunli hordiq bilan bir qatorda hamkasblari bilan tajriba almashish imkoniga ega bo‘ladi.

Finalda aniqlangan 6 nafar g‘oliblar Toshkent shahrida bo‘lib o‘tadigan tantanali tadbirda taqdirlanadi.