Qilmish qidirmish

Jamiyatimizda bugun xotin-qizlarni har tomonlama qoʻllab-quvvatlash, ularning oilada baxtli va farovon yashashlarini ta’minlash, oʻzlariga berilgan huquq va erkinliklaridan oqilona foydalanishlari uchun gʻamxoʻrlik qilinmoqda, keng imkoniyatlar yaratib berilmoqda.
Lekin ayrim erkaklar ayoliga, xotin-qizlarga past nazar bilan qaraydi, unga bir buyumdek muomalada boʻlishadi. Jumladan, “Qadimiy Angor” MFYda yashovchi 1979-yilda tugʻilgan Eshimov Toshmamat (ism, familiyalar oʻzgartirilgan) shunday erkaklardan biri ekan.
U oilali, 3 nafar farzandi boʻlishiga qaramasdan, hech qaerda ishlamaydi. 2022-yil 14-okyabr kuni soat 21:00 larda yashash uyida turmush oʻrtogʻi B.Maraymamatova bilan janjallashib qoladi. Uni haqoratlab, sha’ni va qadr-qimmatini kamsitadi. T.Eshimov oʻzining bu xatti-harakatlari bilan Ma’muriy javobgarlik toʻgʻrisidagi kodeksning 41-moddasida nazarda tutilgan huquqbuzarlikni sodir qilgan.
Sudda T.Eshimov jahl ustida turmush oʻrtogʻi B.Maraymamatovani haqorat qilganligini, hozirda u bilan yarashmoqchi ekanini bildirib, suddan engillik berishni soʻradi.
Jabrlanuvchi B.Maraymamatova esa turmush oʻrtogʻi T.Eshimov doimiy ravishda u bilan janjallashib, uni haqorat qilishini aytib, u bilan yarashmasligini, unga qonuniy chora koʻrishni soʻradi.
Sud kelgusida bu kabi huquqbuzarliklarning oldini olish maqsadida T.Eshimovga MJtKning 33-moddasini qoʻllab, bazaviy hisoblash miqdorining 4 baravari miqdorida ya’ni 1.200.000 soʻm jarima jazosi tayinladi.

Jinoyat ishlari boʻyicha
Angor tuman sudining arxivariusi: O.Japporov