O‘zbekiston Respublikasi Prezidentining Qarori

Aholi va iqtisodiyot tarmoqlarini tabiiy hamda suyultirilgan gaz bilan barqaror ta’minlash hamda ushbu resurslar narxi keskin o‘sishining oldini olish, shuningdek, sohaning investitsiyaviy jozibadorligini oshirish maqsadida:

  1. 2021 yil 1 oktabrdan boshlab yuridik shaxslar tomonidan O‘zbekiston Respublikasiga import qilingan tabiiy gazni realizatsiya qilishda aksiz solig‘ining nol foizlik stavkasi belgilansin.
  2. Belgilansinki:

2022 yil 1 yanvardan boshlab ishlab chiqaruvchi korxonalar tomonidan sotiladigan suyultirilgan gazga aksiz solig‘i solinmaydi;

tadbirkorlik sub’ektlariga tabiiy va suyultirilgan gazni O‘zbekiston Respublikasiga import qilishda qo‘shilgan qiymat solig‘ini 120 kungacha muddatga foizlar hisoblanmagan va uning to‘lanishini ta’minlash talab etilmagan holda, kechiktirib (bo‘lib-bo‘lib) to‘lash huquqi beriladi.

  1. Quyidagilar:

tabiiy gazni, shuningdek, aholiga suyultirilgan gazni realizatsiya qilish tartibga solinadigan tariflar (narxlar) bo‘yicha amalga oshirilishi;

tabiiy gazni, shuningdek, aholiga suyultirilgan gazni uning sotib olish narxidan (tannarxidan) past narxda realizatsiya qilishda, soliqlar qonunchilik hujjatlarida belgilangan tartibda vakolatli organlar tomonidan belgilangan narxdan kelib chiqib hisoblanishi ma’lumot uchun qabul qilinsin.

  1. Moliya vazirligi manfaatdor vazirlik va idoralar bilan birgalikda 2021 yil 1 dekabrga qadar mazkur qarordan kelib chiqib, Soliq kodeksiga o‘zgartish va qo‘shimchalar kiritishni nazarda tutuvchi qonun loyihasini Vazirlar Mahkamasiga kiritsin.
  2. Mazkur qarorning ijrosini samarali tashkil qilishga mas’ul va shaxsiy javobgar etib energetika vaziri A.S. Sultanov belgilansin.

Qaror ijrosini muhokama qilib borish, ijro uchun mas’ul idoralar faoliyatini muvofiqlashtirish va nazorat qilish O‘zbekiston Respublikasi Bosh vaziri A.A. Aripov zimmasiga yuklansin.

O‘zbekiston Respublikasi Prezidenti Sh. Mirziyoyev

Toshkent sh.,

2021 yil 25 oktabr,

PQ-5267-son

 

(Qonunchilik ma’lumotlari milliy bazasi, 25.10.2021 y., 07/21/5267/0993-son)