Бугун Ангор туманида қад ростлаган ўзига хос инновацион ечимга эга "Истеъмолчилар уйи" фойдаланишга топширилди.

Янги масканнинг очилишида туман ҳокими Қосим Мардонов, Ўзбекистон истеъмолчилар ҳуқуқларини ҳимоя қилиш жамиятлари федерацияси раиси Жаҳонгир Саримсоқов, вилоят Халқ қабулхонаси мудири Дилбар Сувонова, нуронийлар ва кенг жамоатчилик вакиллари иштирок этди.

Очилиш маросимида сўзга чиққанлар мазкур бино очилиши соҳа ходимларининг фаолиятини самарали ташкил этишларида алоҳида аҳамият касб этишини таъкидлашди.

"Истеъмолчилар уйи" қошида “Истеъмолчи кутубхонаси” ҳам ташкил этилди. Кутубхона фондидан Ўзбекистон Республикаси қонунлари ва истеъмолчилик соҳасидаги муносабатларни тартибга солувчи меъёрий ҳужжатлар, сиёсий-иқтисодий қўлланмалар, маърифий, бадиий, илмий-оммабоп китоблар ўрин олган.